تفسیر. شعر از ناصر چمن پیرا

مَگو حَرفِ دِلُت تَعبیر نی بیت
اِ نُکتَه بی گَپ و تَفسیر نی بیت
اَگَم حَرفِ دِلُم بِتّا کِه تَهرِن
گَپِ حَق هِز گَه بی تَا ثیر نی بیت

نِهَنگ از آوِ دریا گاو اَز عالَف
حَریص از مالِ دنیا سیر نی بیت
زمین خوار اَز زمین و حَقِ مَردُم
زَمین اَز خَردخِه آدم سیر نی بیت

اَگَن که شیر و بَبر از نَسلِ گُربَن
وَ لا کِن گُربَه هِز گَه شیر نی بیت
لِیاقَت مایَه اُش ایثار و عِشقِن
وَ لاف و مِنَّت و تَز ویر نی بیت

اگَه بَد قُولی و وَعدَه زِرِنگین
اِنِه چِن فاشِ بی تقصیر نی بیت
تِه هَر چَندی تَوِه بَک ریک بُکُو رَنگ
کَلاغِ زِشت وَ کَوگ اَنجیر نی بیت

کَرِشتَه عُمرِ ما چِن بادِ صَرصَر
گُذَشتِ عُمر بی تدبیر نی بیت
غَمِ تو و غَمِ دُنیا مَکولَه
مَه اِحساسُم تِرَپِه تَعمیر نی بیت

اَ فَهمِش عُمرِ شاهین بَر چِه کوتان؟
خوراکُش کِشکِل و بَنجیر نی بیت
دِلِ بی غُصَه چِن کِلَهم پَتِ بَند
وِ ضَربِ هِز زِری پابیر نی بیت

گَپِ جَمسی چِنِ کَند و نَباتِن
کِسی اَز شَهد و عاسَل سیر نی بیت
زَبونِ حَقِ ناصِر هَم عَزیزان
جَوابُش جُز دَمِ شَمشیر نی بیت

مَه جُز شَهرِ جَنَه و مُلکِ ایران
دِگه ذِهنُم وِ چی دَرگیر نی بیت